HII – Stöck Wyys Stich
D Lindä, bekannt fürs Lindä Tee, Chäässchnitte mit Schinkä und dä Verchauf vo Eichhof Lager ide halbliter Fläsche. D Lindä, dettä wo s Cordon-Bleu d Biilag ufm Fitnesställer isch und d Billag s Haar idä Suppe – oder umgekehrt. D Lindä, wo sitt em Rauchverbot schiinbar ebe au nümme s gliche isch wiä früehner, d Ziit aber trotzdem irgndwie stillstah dued. D Lindä, dettä wo mr sich mit 176 cm vorchund wie nä Basketballer, will mr dä Chopf izieh muess. D Lindä, dettä wo am Tisch näbedrah nu die wichtige Sache besproche wärded, so zum Biispiel ob dä Kari und dä Karl jetzt die gliich Person sind oder nid. D Lindä, dettä wo mr s Jasse nu als Sport anerchännt und en Wärtschätzig entgägebringä dued wie nieneds suscht, wo sich au pensionierti Persone für üs Jasser interessiere düend, wo Beobachter mit langjähriger Sporterfahrig die verschiedene Teamtaktike analysiere düend und ihri Meinige und Tipps sofort und ungfragd, als ‚Senior Consultant‘ sozäge, iibringe düend. Churz: D Lindä, s Mekka vo dä guetbürgerliche Chuchi, dä Stammtischproletä und Schauplatz vom nä dänkwürdige Jassturnier!
Gmüetlichi Jassrundi
Zwölf vo dä beschte HII-Jasser hend sich ah däm chaltä Winterabig igfunde, zum unter sich dä nöchsti König z kröne. Scho im Vorfäld isch heiss diskutiert worde über d Favoritärolle und diä einzelne Wettquotene sind umegspickt wie dä Bitcoin-Kurs. Punkt halbi 8i sind de die zwölf siegessichere Herre ah Tisch ghocked und hend die eine agfange dä Jassgott und die andere s Lindä Tee z beschworä. Ab denn heds 2 ½-Stund lang so, so ähnlich oder überhaupt nid so, tönd: „Weisch, ich ha ebe dä Rosä Buur z dritt midm Ass zäme gha. Näbedra scho nu eis, zwei Böck aber nid sonderlich gued..“ – „Hesch du eigntlich au irgndöppis?“ – „Hättisch du öppis chönne mache?“ – „Wie wärs gsi, wenn im zweite Spiel s Ass gspield hättisch, de wär ich nümme go Trümpf zieh und denn hätted mr das chönne heischaukle?!“ – „Gäll, s Nälli isch die höchscht Charte?!“ – „En rundi Cheli gärn!“ – „Hei du! ier hend au es Chartäglück!“ – „Hättisch du s Schilte 7ni gha? Das hed mr ebe nu gfähld..“
So ischs cho, dass nach vier hertumkämpfte Rundene, dä D. Schürmann zum neue Jasskönig usgruefe worde isch! Sogar dä Ärnst Marti hed sich dadezue güsseret:
Tweet vom Ärnst ‚Jassgott‘ Marti
Alli faire Verlüürer wünsched am D. Schürmann jetzt natürlich nume s Bescht uf siim wiitere Jasswäg und hoffed, dass er dä Titel mit viel Stolz träge wird. Alli andere bstelled numal en Tee, en Lindä Tee..
Und dä Vollständigkeit halber:
Schlussresultat
